Futbol üzrə sayca XIX Azərbaycan çempionatına yekun vurulub. “Neftçi” çempionluğunu bayram etməklə növbəti mövsümdə ölkəmizi UEFA Çempionlar Liqasında təmsil etmək hüququ qazanıb. Avro kuboklarda Azərbaycanı təmsil edəcək digər 3 klubdan ikisinin də adına aydınlıq gəlib.

Peşəkar Futbol Liqasından ANS PRESS-ə verilən məlumata görə, “Qarabağ” çempionatda 3-cü yeri tutmaqla Avropa Liqasının 3-cü mərhələsindən mübarizəyə başlamaq hüququ qazanıb. “Xəzər Lənkəran” klubu da çempionatda gümüş medala sahib çıxaraq Avropa Liqasına vəsiqəni özü üçün əmin edib. Ancaq cənub təmsilçisinin Avropa Liqasında mübarizəyə 3-cü? yaxud da 2-ci mərhələdən qoşulacağı Azərbaycan kubokunun final oyunundan sonra məlum olacaq.

Əgər “Xəzər Lənkəran” kubokun həlledici matçında “İnter”i məğlub edərək mükafata sahib çıxarsa o zaman Avropa Liqasında 2-ci mərhələdən mübarizəyə başlamaq hüququ qazanacaq. Bu halda AZAL-da Avropa Liqasında mübarizə aparmağa haqq qazanacaq. AZAL “Xəzər Lənkəran” kuboku qazanacağı təqdirdə Avropa Liqasına vəsiqəni özü üçün təmin edərək 3-cü mərhələdən mübarizəyə qoşulacaq.

Yox, əgər “İnter” kuboka sahib çıxarsa, o zaman Avropa Liqasına vəsiqəni özü üçün təmin edəcək. “İnter” kuboku qazanmaqla Avropa Liqasında mübarizəyə 2-ci mərhələdən start verəcək. Bu halda “Xəzər Lənkəran” mübarizəyə 3-cü mərhələdən başlayacaq.