London Yay Olimpiya oyunlarında iştirak edəcək idmançılarımızın sayı tam müəyyənləşməyib. Çünki lisenziya yarışları bu ilin aprel-may aylarına qədər davam edəcək. Bu möhtəşəm idman tədbiri isə bu ilin 25 iyul-13 avqust tarixlərində keçiriləcək. Bu barədə Azərbaycan Dövlət Bədən Tərbiyəsi və İdman Akademiyasının rektoru, Boks Federasiyasının vitse-prezidenti, Milli Məclisin deputatı Ağacan Abiyev YAP-ın rəsmi saytına müsahibəsində məlumat verib.

Onun sözlərinə görə, Azərbaycan hələlik 30-a yaxın lisenziya qazanıb.

"Amma fikrimcə, bu göstərici 40-dan çox olacaq. Ümumiyyətlə, ölkəmizin olimiya yarışlarında göstəriciləri hər dəfə artımla müşayiət olunur. Düşünürəm ki, bu il Londonda qazanacağımız medalların sayı daha çox olacaq", deyə A. Abiyev qeyd edib.