Bu gecə Bakı-Quba yolunun 11-ci kilometrliyində iki nəfərin xəsarət almasıyla nəticələnən ağır yol-nəqliyyat hadisəsi qeydə alınıb. Yol qəzası Xırdalan dairəsi yaxınlığında, “VAZ-2106” markalı avtomobil tunelə daxil olarkən baş verib. “Jiquli” sürətlə hərəkət edərək tunelə daxil olan zaman bordyura çırpılıb. Daha sonra avtomobil bir neçə metrə sürüşərək digər avtomobillərə dəymədən dayana bilib.

Avtomobilin sürücüsü canını yüngül xəsarətlərlə qurtara bilsə də, maşında olan iki nəfər sərnişinin aldığı xəsarətlər nisbətən ağır olub. Bu səbəbdən də Sumqayıt şəhər sakinləri olan sərnişinlər, 42 yaşlı Rəşid Abbasovla 40 yaşlı Mübariz Əliyev 1 saylı şəhər xəstəxanasına çatdırılıb. Xəstələrdən Rəşidə ilkin tibbi yardım göstərildikdən sonra o evə buraxılıb. Mübarizin bədənində isə sınıqlar aşkarlandığından o, müalicəsini xəstəxanada davam etdirməli olub.

Hadisənin baş verdiyi ünvana Baş Dövlət Yol Polis İdarəsinin əməkdaşları gələrək araşdırmalara başlayıblar.