APA-nın cənub bürosunun məlumatına görə, ilk yanğın hadisəsi avqustun 3-də saat 19.00 radələrində Lənkəran rayonunun Yuxarı Nüvədi və Narbağı kəndləri ərazisindəki meşə massivlərində qeydə alınıb. Fövqəladə Hallar Nazirliyinin (FHN) Lənkəran Rayon Yanğından Mühafizə Hissəsindən hadisə yerinə göndərilən yanğınsöndürən maşınların səyi ilə yanğının genişlənməsinin qarşısı alınıb. Yanğın nəticəsində ümumilikdə 2 hektaradək kol-kos yanıb.

Dünən gecə saatlarında Lənkəran və Lerik rayonlarının dağlıq ərazilərində də meşə yanğınları baş verib. FHN-in Lənkəran və Lerik rayonlarındakı Yanğından Mühafizə hissələrinin yanğınsöndürənləri yanğının söndürülməsinə cəlb olunublar.

Onların, eləcə də meşə mühafizəsi işçilərinin və yerli sakinlərin köməyi ilə yanğın bu gün saat 10.00 radələrində lokallaşdırılıb. Yanğın nəticəsində Lerik rayonunda 5 hektar, Lənkəranda isə 1 hektara kimi meşə massivi yanıb.

İlkin versiya kimi meşə yanğınlarına yerli sakinlərin odla ehtiyatsız davranmasının səbəb olduğu bildirilir. APA