Rusiyanın Novosibirsk şəhərində yerləşən hipermarketlərdən birində oğurluq hadisəsi baş verib. Şaxta Baba paltarı geyinmiş şəxs iki kassir qızı pnevmatik tapança ilə qorxudaraq 7 milyon rublu götürüb. Ancaq oğru uzağa gedə bilməyib.

O, Yol Patrul Xidməti əməkdaşları tərəfindən saxlanılıb. Daxili İşlər Baş İdarəsindən verilən məlumata görə, oğrunu tam təsadüf nəticəsində yaxalamaq mümkün olub. İş ondadır ki, oğru əlində pulla dolu olan kisə ilə qaçarkən pulların müəyyən qismi yerə səpələnib.

Oğrunun başı pulları yığmağa qarışarkən hadisə yerinə gələn milis işçiləri onu yaxalayıblar. Dindirilmə zamanı müəyyənləşdirilib ki, Şaxta Baba paltarı geyinən 33 yaşlı oğru mağazanın administratoru ilə əlbir olub.