Bu gecə Azərbaycanın Göyçay rayonu ərazisində ölümlə nəticələnən yol-nəqliyyat hadisəsi baş verib. Qəza magistral yolun Göyçay rayon Qarabaqqal kəndindən keçən hissəsində qeydə alınıb.

Balakən rayon sakini 49 yaşlı Elşən Qaracayevin Bakı şəhəri istiqamətində idarə etdiyi “QAZel” marakalı yük maşını əks istiqamətdə hərəkətdə olan və Göyçay rayon Qarabaqqal kənd sakini 26 yaşlı Elvin Yusifovun idarə etdiyi “VAZ-21011” markalı minik maşını ilə toqquşub. "Jiquli"nin sürücüsü Elvin Yusifovun aldığı ciddi bədən xəsarətləri onun elə öz avtomaşınının sükanı arxasında dünyasını dəyişməsinə səbəb olub.

Avtomobillərdə olan digər şəxslər isə müxtəlif bədən xəsarətləri ilə Göyçay rayon Mərkəzi Xəstəxanasına yerləşdiriliblər.

Baş vermiş yol qəzası Baş Dövlət Yol Polis İdarəsinin əməkdaşları tərəfindən araşdırılıb, hadisə yeri müayinə edilib. İlkin versiya olaraq isə nəqliyyat vasitələrinin yüksək sürətlə idarə edilməsi və qaranlıq hava şəraiti əsas gətirilib.

Faktla bağlı AR CM-nin 263.2-ci (yol hərəkəti və nəqliyyat vasitələrinin istismarı qaydalarını pozma, ehtiyatsizliqdan zərərçəkmiş şəxsin ölümünə səbəb olduqda) maddəsi ilə cinayət işi başlanılıb, araşdırmalar davam etdirilir.