Paytaxtın Nəsimi rayonu ərazisində 4 avtomobilin iştirakı ilə zəncirvari yol-nəqliyyat hadisəsi baş verib. ANS TV-nin məlumatına görə, hadisə Üzeyir Hacıbəyov küçəsində, Azərbaycan Dövlət Dəniz Akademiyasına məxsus yataqxana binasının qarşısında qeydə alınıb.

Nəsimi Rayon Polis İdarəsinin təhqiqatçisi Polad Əliyevin verdiyi məlumata əsasən, Bakı şəhər sakini, 52 yaşlı Cəbrayıl Filağa oğlu Dadaşovun idarə etdiyi “VAZ-2104” markalı, 10 HJ 427 dövlət nömrə nişanlı avtomobil işıqforun qırmızı işığında dayanmış Bienko Sergey İvanoviçə məxsus “Nissan Tiida” markalı 90 AS 955 dövlət nömrə nişanlı maşına çırpılıb. Həmin maşın isə öz növbəsində qarşısında dayanmış Mehmet Uzunoğlunun idarə etdiyi “Hyundai” markalı 90 SR 277 dövlət nömrə nişanlı avtomobilə və nəhayət o da öz növbəsində irəlidəki Ramin Azər oğlu Əmirliyə məxsus “VAZ 2107” markalı 90 SB 058 dövlət nömrə nişanlı avtomobilə dəyib.

Hadisə nəticəsində sürücülərdən ikisi, “VAZ 2104” və “Hyundai” markalı avtomobillərin sahibləri yüngül xəsarət alıb və onlara yaxınlıqdakı özəl tibb müəssisəsində ilkin yardım göstərilib. Hazırda vəziyyətləri qənaətbəxşdir.

Aavtomobillər isə yararsız hala düşüb.
Faktla bağlı Nəsimi Rayon Polis İdarəsində araşdırma aparılır. Yol qəzasının baş verməsinə ilkin ehtimal kimi sürət rejiminə əməl edilməməsi göstərilir. ANSPRESS