Bu gün axşam saatlarında Bakının Sabunçu rayonunda ağır yol-nəqliyyat hadisəsi baş verib. Saat 18:50 radələrində Zabrat qəsəbəsinin girəcəyində baş verən qəzada yük avtomobili ilə minik avtomobili toqquşub.

Hadisə şahidlərinin ANS PRESS-ə verdiyi məlumata görə, qəza zamanı 20 AE 066 dövlət nömrə nişanlı “Mercedes” markalı yük maşını ilə 10 HF 957 dövlət nömrə nişanlı “QAZ 24” markalı maşın toqquşub. Yol-nəqliyyat hadisəsi nəticəsində minik avtomobilinin sürücüsünün hadisə yerində dünyasını dəyişdiyi bildirilir. Minik avtomobilində olan bir qadın və azyaşlı təcili yardım maşını ilə xəstəxanaya aparılıb.

Sabunçu rayonu 3 saylı şəhər Klinik Xəstəxanasından ANS PRESS-ə verilən məlumata görə, xəstəxanaya gətirilən təqribən 13 yaşlı qızın şəxsiyyəti hələ dəqiqləşməyib. Xəstənin vəziyyəti ağır olduğundan cərrahiyyə şöbəsinə qəbul edilib və hazırda cərrahiyyə əməliyyatı davam edir.

Hadisə yerinə Bakı şəhər Dövlət Yol Polisi İdarəsinin Sabunçu rayon bölməsinin əməkdaşları gəlib, hazırda qəzanın səbəblərin araşdırılması və yolda tıxacın yaranmaması üçün tədbirlər görülür. ANSPRESS