Bakının Nizami rayonunda yerləşən “Oskar” şadlıq sarayından oğurluq edən 4 nəfərlik dəstə ifşa edilib. Saxlanılan şəxslər Famil Abbasov, Təbriz Rüstəmov, Namiq Abbasov və Ramil Məmmədzadədir. Cinayət hadisəsinə gəlincə, oğurluq bu il may ayının 23-dən 24-nə keçən gecə törədilib.

Naməlum şəxslər şadlıq sarayının arxa qapısından içəri daxil olaraq inzibatçının otağından böyük seyfi aparıblar. Elə həmin gün oğruların tapılması istiqamətində Nizami rayon Polis İdarəsinin əməkdaşları tədbirlər həyata keçirib. İlk olaraq şadlıq sarayının gözətçisinin ifadəsi alınıb. Gözətçinin bildirdiyinə görə, həmin sarayda barmen işləyən 23 yaşlı Abşeron sakini Famil Abbasov hadisədən təqribən 2-3 saat əvvəl ayaqyoluna getmək adı ilə içəri daxil olub.

Gözətçinin ifadəsi polisdə oğurluğun Famil Abbasov tərəfindən törədilməsi şübhəsini yaradıb. Bundan sonra Famil Abbasov şübhəli şəxs qismində cəlb edilib. Dindirilmələr zamanı Famil törətdiyi oğurluğu etiraf etməklə yanaşı, hadisədə ona kömək edənlər barədə də danışıb.

Nizami RPİ-nin müstəntiqi Səfərəli Həsənovun sözlərinə görə, dəstə üzvləri oğurluğa hazırlıqlı gəliblərmiş. Əvvəlcədən dəmir barmaqlıqları qırmaq üçün armaturlar və əl izləri qoymamaq üçün rezin əlcəklər götürüblər. Qurulmuş plan tam olaraq həyata keçiriləndən sonra oğurlanmış seyf Ramil Məmmədzadənin idarə etdiyi “VAZ 2107” markalı maşınla elə onun öz evinə gətirilərək sındırılıb. Seyfin içərisindən 10 min rubl, yəni təqribən 250 manat pul və şadlıq evinin sənədləri çıxıb.

Dəstə üzvlərinin oğurlayıb içini boşaltdıqları seyf isə Suraxanı rayonu ərazisində olan süni bir gölməçəyə atılıb. Faktla bağlı Nizami rayon Polis İdarəsində cinayət işi başlanıb.

Xatırladaq ki, bu, “Oskar” şadlıq sarayında baş verən ilk hadisə deyil. İki il əvvəl həmin şadlıq sarayından seyflə qarışıq 12.000 dollar oğurlanmışdı. Cinayəti törədən şadlıq sarayının o vaxtkı gözətçisi Samir Əhmədov həbs edilmişdi. ANSPRESS