Paytaxtın Qaradağ rayonu ərazisində ölümlə nəticələnən ağır avtoqəza hadisəsi baş verib. Fövqəladə Hallar Nazirliyinin rəsmi internet səhifəsində yer alan xəbərə görə, "Mitsubishi" markalı minik və "KamAZ" markalı yük avtomobili toqquşub.

Nəticədə, hər iki nəqliyyat vasitəsi deformasiyaya uğrayıb, sürücülər yaralanıb. Minik avtomobilində olan 2 nəfər həlak olub, yaralılar isə xəstəxanaya aparılıb.

Hadisə yerinə cəlb edilən xilasedicilər xüsusi alət və avadanlıqlar vasitəsilə deformasiyaya uğramış nəqliyyat vasitəsində sıxılıb qalan cəsədləri çıxararaq aidiyyəti üzrə təhvil verib. Ərazidə müvafiq təhlükəsizlik işləri görülüb. Əməliyyat saat 07:17-də başa çatıb.

Faktla bağlı araşdırma aparılır.