Bu gün Quba rayonunda meşə yanğını baş verib. Saat 16:30 radələrində başlayan yanğın nəticəsində təqribən 50 hektara yaxın ərazi yanıb ki, bunun da yarısının meşə sahəsi olduğu bildirilir. ANS PRESS-in bölgə müxbirinin verdiyi məlumata görə, yanğın rayonun Pirvahid və Talaqışlaq kəndlərinin ərazisindəki əkin və meşə sahələrini əhatə edib.

Yanğının qarşısının alınması üçün Quba, Xaçmaz, Şabran rayonlarındakı Yanğından Mühafizə hissələrinin hər birindən iki yanğınsöndürən maşın, Fövqəladə Hallar Nazirliyinin Şimal Regional Mərkəzinin xilasetmə bölməsinin 20 nəfərə yaxın şəxsi heyəti, yaxınlıqdakı kəndlərin əhalisi hadisə yerinə cəlb olunub. Qərb küləyi ilə müşayiət olunan isti hava şəraitinə baxmayaq, yanğının qarşısı alınıb.

Quba rayon İcra Hakimiyyətinin İkinci Nügədi kəndi üzrə icra nümayəndəsi Rafiq Abdullayevin sözlərinə görə, hazırda ərazidə alov söndürülsə də, tüstülənmə davam etdiyindən, baş verə biləcək növbəti yanğın ehtimalının qarşısını almaq üçün ərazidə növbətçilik təşkil olunub.

Qeyd edək ki, şimal bölgəsində bir neçə gün öncə Şabran rayonunda da meşə yanğınları baş vermişdi. ANSPRESS