Gürcüstanın şimalında meşə yanğınları tüğyan edir. Paytaxt Tiflis yaxınlığında başlamış yanğın artıq bütöv meşə massivlərini əhatə edib. Ötən gün yanğın Kaxetiyanın bir neçə rayonuna da yayılıb. Mçxeta-Mtianeta regionunun 4 rayonunda meşələr yanmağa davam diedir. Bir neçə gün ərzində burada 30 hektara qədər ərazi külə dönüb.
Gürcüstan prezidentinin Mçxeta-Mtianeta regionundakı səlahiyyətli nümayəndəsi Çezar Çoçeli yanğının regionun Kazbeq, Tianet, Çxvariçamia və Axalqor rayonlarını öz cənginə aldığını bildirib. Axalqor meşə massivində tüğyan edən yanğının yaxınlıqdakı Rusiya hərbi bazası üçün təhlükə törətdiyi də bildirilir.

Tiflis yaxınlığındakı Çxvariçamia milli parkına da yanğından ziyan dəyib. Yanğını nəzarət altına almaq bu gün mümkün olub. Həmin əraziyə xüsusi texnika cəlb edilə bilmədiyindən, yanğınsöndürənlər və yerli sakinlər özləri alovla mübarizə aparırlar. Yanğınla mübarizə üçün Gürcüstan Daxili İşlər Nazirliyinin fövqəladə hallar departamentinin helikopteri də cəlb olunub. Xəsarət alanların olmadığı bildirilib. Yanğına insanların odla ehtiyatsız davranmasının səbəb olduğu ehtimal edilir.