Bakının Nərimanov rayonu ərazisində qatarla maşının toqquşması ilə nəticələnən qəza baş verib. Rayonun 205-ci yaşayış massivində yük daşıyan qatar “Opel” markalı minik maşınını vuraraq onu yaxınlıqdakı evlərin hasarına sıxışdırıb. Qəza nəticəsində xəsarət alan olmasa da, minik maşınına ciddi ziyan dəyib.

Avtomaşının sahibi Qurban Hüseynov ANS-ə bildirib ki, hadisə zamanı avtomobilin sükanı arxasında oğlu olub və onlar ata-bala evlərinə gedərkən dəmir yolu xəttini keçmək istəyiblər. Bu zaman isə yaxınlıqdakı kommersiya müəssisələrindən birinə yük daşıyan qatarın onlara yaxınlaşdığını görüblər:

“Burada yol nişanı olmayıb. Oğlum qatarın gəldiyini görəndə maşını geri sürmək istədi. Qatar elə sürətlə gəldi ki, uşaq vaxt edib hərəkət edə bilmədi. Avtomobilə çox ziyan dəyib. Artıq ələ gələn deyil. Daha bu avtomobil ölüxanalıqdır".

Hadisə yerinə Nərimanov rayon Dövlət Yol Polisi Şöbəsi və Post Patrul Xidmətinin əməkdaşları gələrək ilkin araşdırmalara başlayıblar. ANSPRESS