Bakı şəhərində avtoyuma məntəqəsində baş verən güclü yanğın böyük həyəcana səbəb olub. Səbəb yanğın baş verən ərazidə yanacaqdoldurma məntəqəsinin partlamaq təhlükəsi olub. Fövqəladə Hallar Nazirliyinin Yanğından Mühafizə Xidmətindən verilən məlumata görə, yanğın hadisəsi bu gün saat 21:00 radələrində Səbail rayonu, Bayıl qəsəbəsi, Mikayıl Hüseynov küçəsində yerləşən avtoyuma məntəqəsində meydana gəlib. Yanğına məntəqənin ətrafında yerə tökülmüş yanacaq məmulatının alışması səbəb olub. Yanğın qısa zamanda məntəqəyə də keçib.

Yanğın zamanı ətrafda yaşayan sakinlər böyük həyəcan keçiriblər. Buna səbəb yanğının avtoyuma məntəqəsinin yaxınlığında yerləşən "Lukoil" yanacaqdoldurma məntəqəsinə keçmə təhlükəsi olub. Hadisə yerinə vaxtında yetişən yanğınsöndürənlər sakinlərin həyəcanına son qoyublar. Yanğının qarşısı qısa zamanda alındığından baş verə biləcək təhlükə də sovuşub.

Faktla bağlı araşdırma aparılır. ANSPRESS