Bu gün Bakı şəhərində uşaq bağçasında yanğın hadisəsi baş verib. Yanğın saat 17:50 radələrində Səbail rayonu, Ömər Faiq Nemanzadə küçəsi 17 ünvanında yerləşən 332 saylı uşaq bağçasında qeydə alınıb.

Uşaq bağçasının 700 kvadratmetrlik ərazisinin 30 kvadratmetri tamamilə yanıb. Hadisə yerinə Föqəladə Hallar Nazirliyinin üç yanğınsöndürən maşını cəlb olunub və qısa zamanda alovun qarşısı alınıb. Yanğın baş verərkən bağçada 12 uşaq olsa da, xoşbəxtlikdən həmin vaxt uşaqlar axşam gəzintisinə çıxarılıbmış. Heç bir xəsarət almayan uşaqlar təcili olaraq yanğının baş verdiyi ərazidən uzaqlaşdırılıb.

Gözətçi otağından başlayan yanğının ilkin səbəbi kimi elektrik naqillərində baş verən qısaqapanma göstərilsə də, hadisənin dəqiq səbəbləri aparılan araşdırmalardan sonra bəlli olacaq. ANSPRESS