“Dünyada bitib tükənməyən türk düşmənçiliyi var”. Bunu Türkiyə Samsun şəhərində keçirilən “Tarixdən bu günə Türkiyə Azərbaycan münasibətləri” adlı konfransda çıxış edən DAK sədri və millət vəkili Sabir Rüstəmxanlı deyib. “Ondoqquz may” univrsitetində keçirilən tədbirdə Sabir Rüstəmxalı ilə yanaşı Azəri-Türk qadınlar birliyinin sədri Tənzilə Rüstəmxanlı da iştirak edib.

Türklərin və azərbaycanlıların eyni millət olduğunu deyən S. Rüstəmxanlı adların heç bir əhəmiyyəti olmadığını, türklərin bütün dünyada bir millət olduğunu bildirib. Millət vəkili həmçinin bütün türkləri birlik olmağa çağırıb: “Bütün dünyada türk düşmənçiliyi var. Buna qarşı türklər birlik olmalıdır. Dünya nə vaxt başlayıbsa türkün tarixi də o vaxt başlayır.

Min illər boyu türklərin Altaylardan Anadoluya qədər geniş əraziyə yayıldığını bildirən S. Rüstəmxanlı çıxışına hər iki ölkə liderlərindən sitatlarla davam edib: “Heydər Əliyevin dediyi kimi, `Bir millət, iki dövlətik`, Atatürkün dediyi kimi, `Azərbaycanın sevinci sevincimiz, kədəri kədərimizdir!` Böyüklərimiz bizim birliyimizi daha yaxşı başa düşüblər”.

Azəri-Türk qadınlar birliyinin sədri Tənzilə Rüstəmxanlı isə dünyada tarixindən utanmayan yeganə millətin türklər olduğunu deyib: “Türkiyə Azərbaycan münasibətləri bu günə bağlı deyil. Bizi bir-birimizə bağlayan çox əhəmiyyətli məsələlər var. Bunlardan ən əhəmiyyətlisi Dağlıq Qarabağ və erməni məsələsidir. Bu gün Ermənistan adlı dövlətin olduğu yer də əslində türklərindir. Həmçinin paytaxt İrəvan da türk şəhəridir”.

T. Rüstəmxanlı bu torpaqların ermənilərə bir daha Qağlıq Qarabağ məsələsini dilə gətirməmək şərtiylə verildiyini, Ermənistanın bu şərtlərə riayət etmədiyini deyib. “Qarabağ Azərbaycan torpağı olduğu üçün işğal edilmədi. Qarabağ Türkiyə üçün çox əhəmiyyətli olduğu üçün işğal edilib. Cənubi Qafqazda Türkiyə ilə Azərbaycanı ayırmaq üçün Ermənistan qara-yara kimi yaradılıb”. ANSPRESS