Bu gün iki Milli qəhrəmanımızın doğum günüdür. İmamverdi Barat oğlu Əliyev 1950-ci il oktyabrın 1-də İmişli rayonu Qulubəyli knədində anadan olub. Qarabağ Azadlıq Təşkilatının mətbuat xidmətindən ANS PRESS-ə verilən məlumata görə, o, milis (polis) zabiti kimi 1991-ci ildən cəbhə bölgələrində döyüşlərdə yaxından iştirak edib, 1991-ci il noyabrın 15-də Dağlıq Qarabağın Şadax kəndi uğrunda 17 nəfər yoldaşı ilə düşmənin 100-dən artıq qüvvəsinə qarşı döyüşə girib, 10 saat çəkən döyüşdə onlarla erməni yaraqlısını məhv edib, xüsusi rəşadət göstərib və qəhrəmanlıqla həlak olub.

1992-ci il oktyabrın 8-də ona Milli Qəhrəman adı verilib. İmişli rayonunda dəfn edilib. Rayonun küçələrindən biri və Qulubəyli orta məktəbi onun adını daşıyır. Rayon Daxili İşlər Şöbəsinin qarşısında büstü qoyulub.

Kazım Ərşad oğlu Məmmədov isə 1969-cu il oktyabrın 1-də Cəbrayıl rayonu Böyük Mərcanlı kəndində anadan olub. O, 1991-ci ilin fevralında Cəbrayılda milis (polis) sıralarına daxil olub, rayonun kəndlərinin düşməndən müdafiə olunmasında yaxından iştirak edib, 1991-ci il noyabrın 15-də ermənilərin Xocavənd rayonu Zamzur kəndinə hücumunun qarşısını almaq üçün kiçik dəstə ilə döyüşə girib, özünə istehkam seçdiyi evdə axıra qədər vuruşub, onlarla düşməni məhv edib, ermənilər onun təslim olmadığını görüb evə od vurublar, qəhrəman əsgər orada həlak olub. 1992-ci il oktyabrın 8-də ona Milli Qəhrəman adı verilib.

Böyük Mərcanlı kəndində dəfn edilib. Oxuduğu məktəbə onun adı verilib, məktəbin qarşısında büstü qoyulub. Adına 3 mükafat təsis edilib. ANSPRESS