Böyük Britaniyanın yeni hökuməti də “erməni soyqırımı”nı tanımayacaq. Bunu Böyük Britaniyanın Ermənistandakı səfiri Çarlz Lonsdeyl deyib. Onun sözlərinə görə, Londonun bu istiqamətindəki siyasətində heç bir dəyişiklik olmayacaq: “Yeni hökumətin bu məsələdəki siyasətində çətin ki dəyişiklik görək. Biz faktı etiraf edirik və əzab-əziyyətə görə kədərlənirik. Lakin soyqırımı hüquqi anlayışdır. Bu gün dünyanın heç bir məkhəməsi 1915-ci il hadisələrini soyqırımı kimi tanıya bilməz. Britaniya hökuməti də hüquqi termindən tarixi hadisələri xarakteriza etmək üçün istifadə edə bilməz”.

Ermənistan-Türkiyə və Ermənistan-Azərbaycan münasibətlərinə toxunan britaniyalı diplomatın fikrincə, yaxın gələcəkdə bu məsələdə irəliləyiş olmayacaq. Onun sözlərinə görə, Britaniya bu məsələdə siyasi yox, ictimai-mədəni müstəvidə çıxış edir, birgə layihələri, təmasları və verilişləri genişləndirir.

Çarlz Lonsdeyl Ermənistandakı vəziyyətə də toxunub. O bəyan edib ki, Ermənistanın əsas problemi oliqarx sistemidir. Səfir bildirib ki, oliqarxlar bazarda hökmrandır və hətta Ermənistan parlamentini də idarə edir. Diplomat deyib ki, bu, ciddi narahatlıq doğrur. ANSPRESS