Fransa prezidenti Nikolya Sarkozi Türkiyəyə səfərə gələcək. Amma cəmi 5 saat davam edəcək səfərə Sarkozi həyat yoldaşı Karla Brunini gətirməyəcək. "Vatan" qəzetinin yazdığına görə, “France-Press”ə bu haqda adı gizli saxlanılan türkiyəli diplomat danışıb.

"İstərdik ki, Sarkozi Türkiyədə daha çox qalsın, amma görünür, o bunu istəmir” qeyd edən türkiyəli diplomat əlavə edib ki, Sarkozinin Türkiyəyə səfəri təxminən 5-6 saat davam edəcək.

Qeyd edək ki, Fransa prezidenti Nikolya Sarkozinin Türkiyəyə səfəri fevralın 25-ə planlaşdırılıb. Səfər çərçivəsində Türkiyə-Avropa Birliyi, eləcə də regional və digər bir sıra məsələlər müzakirə ediləcək.

Xatırladaq ki, ötən il Türkiyə baş naziri Rəcəb Tayyib Ərdoğan Fransaya səfəri zamanı Sarkozini öz ölkəsinə dəvət edib.