Ermənistan prezidenti Serj Sarkisyan ermənilər tərəfindən “Qərbi Ermənistan torpaqları” adlandırılan Türkiyənin şərqindəki Ağrı dağı ərazilərinin geri alınmasını ölkə gənclərinə hədəf göstərdi. Ötən gün Ermənistanda keçirilən erməni dili və ədəbiyyatı müsabiqəsində şagirdlərdən birinin “Qərb torpaqlarımızı Ağrı dağıyla birlikdə geri ala biləcəyikmi?” sualına Sarkisyan boyundan böyük cavab verib: “Bu sizə bağlıdır. Bizim dövrün insanları öz öhdəliklərini layiqincə yerinə yetirərək 1990-cı illərdən sonra vətənimizin parçası olan Qarabağı düşmən əlindən xilas etdi. Hər nəsllin öz vəzifəsi var. Sizin də gələcəkdə öz vəzifələrinizi yerinə yetirib yetirməyəcəyiniz birlik və bütovlüyünüzə bağlıdır. Biz erməni milləti həmişə səməndər quşu kimi öz külümüzdən dirilməyi bacarmışıq. Amma qeyd etməliyəm ki, bu gün dünyada ölkələrin etibarı onların ərazisi ilə ölçülmür. Ermənistan müasir, təhlükəsiz və uğurlu iqtisadiyyatı olan ölkə olsa etibarı da o qədər yuxarı olacaq”. ANSPRESS