Martın 10-da Sankt-Peterburqda məşhur azərbaycanlı müğənni və bəstəkar Müslüm Maqomayevə həsr edilən konsert keçiriləcək. Bu barədə Bakı Şəhər Mədəniyyət və Turizm İdarəsindən məlumat verilib.

Konsertdə Azərbaycanın əməkdar artisti, Rusiyanın Böyük Teatrının solisti Dinara Əliyeva, Rusiyanın xalq artisti, Ukraynanın əməkdar artisti Vasili Qerello, Müslüm Maqomayevin repertuarından mahnılar ifa edən Metodiye Bujor, Rusiya estradasının ulduzu Yelena Vaenqanın da iştirakı gözlənilir.

M.Maqomayev 1942-ci il avqustun 17-də Bakıda doğulub. O, Kremlin Qurultaylar sarayında 1962-ci ildə Azərbaycan incəsənəti festivalının son konsertində çıxışından sonra məşhurlaşıb. M.Maqomayev müxtəlif beynəlxalq müsabiqələrin laureatı olub, çoxsaylı mükafatlara layiq görülüb.