Bu gün Quba rayonunun Ərməki kəndi ərazisində bağ sahəsində yanğın baş verib. Hadisə barədə saat 15:28-də Fövqəladə Hallar Nazirliyinin Quba Dövlət Yanğından Mühafizə Hissəsinə məlumat daxil olub. Yanğın baş verən əraziyə iki yanğınsöndürən maşın cəlb olunub.

Quba Dövlət Yanğından Mühafizə Hissəsinin rəsi Əzizağa Qasımovun ANS PRESS-in bölgə müxbirinə verdiyi məlumata görə, saat 16:30-da yanğının qarşısı alınıb. Hadisə nəticəsində 2 hektara yaxın bağ sahəsi yanaraq məhv olub.

Qeyd edək ki, yanğın baş verən bağ sahəsinin meşə massivinin yaxınlığında yerləşməsi alovun meşəyə keçməsi üçün də təhlükə yaradıb. Quba rayon Meşə Mühafizəsi və Bərpası Müəssisəsindən verilən məlumata görə, son günlər meşə ətrafında yerləşən bağ və əkin sahələrində mütəmadi olaraq yanğın hadisələrinin baş verməsi ilə əlaqədar araşdırılma aparılması üçün hüquqmühafizə orqanlarına müraciət olunub. ANSPRESS