Türkiyənin telekanallarından birində yayımlanan, Azərbaycanda da kifayət qədər tamaşaçısı olan “Arka Sokaklar” serialında Əli (Lalə) obrazını canlandıran aktyor Alp Korkmaza xəbərdarlıq olunub. Xatırladaq ki, yayımlanan son – 259-cu seriyanın finalında filmin baş obrazı Rza babanın kürəkəni, asayiş şöbənin snayperi olan Əli güllələnərək xəstəxanaya çatdırılır.

Məlumata görə, Alp Korkmaz son günlər intizamsız hərəkətləri ilə serialı çəkən “Erler film” prodüsser şirkəti rəhbərliyini əsəbləşdirirmiş. Filmdə hadisələrin bu şəkildə cərəyan etməsi isə Korkmaza xəbərdarlıq mahiyyətindədir. Belə ki, Korkmaz ya ölərək serialdan ayrılacaq, ya da hərəkətlərinə diqqət edərək aldığı yaradan sağalacaq və çəkilişlərə davam edəcək.

“Milliyet” qəzetinin məlumatına görə, cəzalandırıldığını başa düşən Alp Korkmaz hərəkətlərinə diqqət etməyə başlayıb.