Bu gün Azərbaycanın birinci xanımı, Heydər Əliyev Fondunun prezidenti Mehriban Əliyeva ölkəmizdə səfərdə olan beynəlxalq polis təşkilatı – İnterpol-un baş katibi Ronald Noblun başçılıq etdiyi nümayəndə heyəti ilə görüşüb. ANS PRESS-in “AzərTAc”a istinadən verdiyi məlumata görə, Heydər Əliyev Fonduna gələn İnterpol-un nümayəndə heyətinə əvvəlcə Fondun məqsədi və fəaliyyəti haqqında məlumat verilib.

Qonaqların diqqətinə çatdırılıb ki, Fond ümummilli lider Heydər Əliyevin zəngin irsini öyrənmək, milli dövlətçilik ideyalarını yeni nəsillərə daim aşılamaq məqsədini daşıyır. Bildirilib ki, fondun fəaliyyətində səhiyyə, təhsil, sosial və mədəniyyət sahələrində layihələrin həyata keçirilməsi prioritet istiqamətlərdir.

İnterpol-un nümayəndə heyəti ulu öndərin şəxsi arxivindən götürülən və fəaliyyətinin müxtəlif dövrlərini əhatə edən eksponatlar və fotoşəkillərlə tanış olub. R.Nobl Fondun xatirə kitabına ürək sözlərini yazıb.

Sonra İnterpol-un nümayəndə heyəti ilə görüşən Heydər Əliyev Fondunun prezidenti Mehriban Əliyeva qonaqları salamlayaraq bildirib ki, onların ölkəmizlə daha yaxından tanış olmaq imkanı var. Azərbaycanın bu il müstəqilliyinin 20-ci ildönümünü qeyd etdiyini deyən Heydər Əliyev Fondunun prezidenti ötən müddətdə ölkəmizin böyük nailiyyətlər əldə etdiyini, regionun lider dövlətinə çevrildiyini, respublikamızda bütün sahələrdə sürətli inkişafın getdiyini diqqətə çatdırıb.

Mehriban Əliyeva xüsusilə qeyd edib ki, Azərbaycan təhlükəsiz ölkədir və respublikamızda cinayətkarlığın səviyyəsi çox aşağıdır. Heydər Əliyev Fondunun prezidenti ölkəmizin 1992-ci ildən İnterpol-a üzv olduğunu, dövlət və hökumət orqanları ilə bu qurum arasında sıx əlaqələrin qurulduğunu vurğulayıb.

Heydər Əliyev Fondunun fəaliyyəti haqqında danışan Mehriban Əliyeva Fondun 2004-cü ildən fəaliyyət göstərdiyini söyləyib. “Ümidvaram ki, biz qeyri-hökumət təşkilatı olaraq gələcəkdə əməkdaşlıq qura bilərik”, - deyən Azərbaycanın birinci xanımı Heydər Əliyev Fondunun BMT, UNESCO, UNİCEF, İSESCO və digər beynəlxalq qurumlarla əməkdaşlığını qeyd edib.

“Azərbaycan təhlükəsizlik baxımından nümunəvi ölkədir” deyən İnterpol-un baş katibi Ronald Nobl isə Heydər Əliyev Fondunun fəaliyyətindən məlumatlı olduğunu vurğulayaraq Fondun mədəniyyət tədbirlərinin keçirilməsindəki təcrübəsini qeyd edib. O, gələcəkdə Azərbaycanda birgə mədəni tədbirlərin keçirilməsini təklif edib.

Sonra Ronald Nobl İnterpol-un bu il təsis etdiyi “Daha təhlükəsiz dünyanın yaradılmasında xidmətə görə” yadigar medalını Mehriban Əliyevaya təqdim edib.

Baş katib R.Nobl bildirib ki, Mehriban Əliyeva dünyada bu medalın təqdim olunduğu ilk şəxsdir.