İtaliyada Azərbaycan Mədəniyyəti Günlərinin başa çatması ilə bağlı paytaxt Romadakı “Auditorium della Musika” konsert kompleksində mərasim keçirilib. Heydər Əliyev Fondunun, Azərbaycan Mədəniyyət və Turizm Nazirliyinin təşəbbüsü, ölkəmizin İtaliyadakı səfirliyinin və Roma şəhər meriyasının dəstəyi ilə keçirilən mərasimdə birinci xanım, Heydər Əliyev Fondunun prezidenti Mehriban Əliyeva və Fondun vitse-prezidenti Leyla Əliyeva iştirak edib. Azərbaycanın birinci xanımı Mehriban Əliyeva burada Roma şəhərinin meri Gianni Alemanno ilə görüşüb. Roma meri Azərbaycanın birinci xanımını İtaliya paytaxtında görməkdən şad olduğunu bildirib. Gianni Alemanno Mehriban xanım Əliyevanın fəaliyyəti barədə məlumatlı olduğunu demiş, ölkələrimiz arasında mədəni əlaqələrin inkişafının əhəmiyyətinə toxunmuşdur. Mer Bakı ilə Roma arasında yeni açılmış təyyarə reysinin ona Azərbaycan paytaxtını görmək üçün fürsət yaradacağını vurğulamışdır.

Heydər Əliyev Fondunun prezidenti Mehriban xanım Əliyeva Romada dahi Nizami Gəncəvinin abidəsinin ucaldılmasına verdiyi dəstəyə görə Gianni Alemannoya təşəkkürünü bildirmişdir. İtaliyada Azərbaycan Mədəniyyəti Günlərinin keçirilməsindən məmnunluq ifadə edən birinci xanım bu cür tədbirlərin gələcəkdə də davam etdirilməsinin əhəmiyyətini vurğulamışdır.
Roma şəhərinin meri Gianni Alemanno Azərbaycanın birinci xanımı Mehriban Əliyevaya xatirə hədiyyəsi təqdim etmişdir.

X X X
İtaliyada Azərbaycan Mədəniyyəti Günlərinin başa çatması ilə bağlı təşkil olunan mərasimin aparıcısı ölkəmiz, onun tarixi, mədəniyyəti barədə ətraflı məlumat vermişdir.
Azərbaycanın İtaliyadakı səfiri Vaqif Sadıqov mədəniyyət günlərinin yüksək səviyyədə keçdiyini bildirmişdir. Diplomat qədim tarixə malik Azərbaycan-İtaliya əlaqələrinin bu gün də uğurla inkişaf etdiyini, İtaliyanın ölkəmizin ən böyük ticarət tərəfdaşlarından biri olduğunu diqqətə çatdırmışdır. Ölkələrimiz arasında humanitar əlaqələrin əhəmiyyətinə toxunan səfir mədəniyyət günlərinin ikitərəfli münasibətlərin inkişafında mühüm rol oynayacağını vurğulamışdır.
Mərasimdə çıxış edən Roma şəhərinin meri Gianni Alemanno da qədim tarixə söykənən Azərbaycan-İtaliya əlaqələrinin inkişafı ilə bağlı son dövrlərdə atılan addımların əhəmiyyətindən danışmışdır. Mer dahi Azərbaycan şairi və mütəfəkkiri Nizami Gəncəvinin Romada ucaldılan abidəsinin ölkələrimiz arasındakı mədəni əməkdaşlığa mühüm töhfə olduğunu vurğulamışdır.
Sonra Azərbaycan incəsənət ustalarının iştirakı ilə möhtəşəm konsert proqramı təqdim edilmişdir.
Konsertin ilk nömrəsi Xalq Artisti Afaq Məlikovanın rəhbərlik etdiyi Azərbaycan Dövlət rəqs ansamblının ifasında “Cəngi” rəqsi olmuşdur.
Sonra Əməkdar Artist Elnarə Kərimovanın rəhbərliyi ilə “Buta” kamera xorunun ifasının, həmçinin “Sarı gəlin” xalq mahnısının, “Qarabağ yallısı”nın, “Novruz” ritmlərinin və Azərbaycanın bir-birindən maraqlı digər musiqilərinin səsləndiyi möhtəşəm “Auditorium della Musika” konsert kompleksində minlərlə tamaşaçı milli mədəniyyətimizin şahidi olmuşdur.
Qeyd edək ki, İtaliyada Azərbaycan Mədəniyyəti Günləri aprelin 16-da Turin şəhərinin italiyalıların qürur mənbəyi sayılan möhtəşəm Kariniano Teatrında start götürmüşdür. Daha sonra Milan və Venesiya şəhərlərində keçirilən mədəniyyət tədbirlərinə son olaraq paytaxt Romada yekun vurulmuşdur.
İtaliyada keçirilən tədbirlər bir daha sübut etmişdir ki, mədəniyyətlərarası dialoq platformasının yaradılmasında strateji məkan funksiyasını həyata keçirən ölkəmiz artıq mədəni dəyərləri, zəngin musiqisi ilə dünyanın diqqətini çəkir.