Azərbaycan prezidenti İlham Əliyev Qırğızıstanın yeni seçilmiş Prezidenti Almazbek Atambayevə təbrik məktubu ünvanlayıb. ANS PRESS-in prezidentin rəsmi saytına istinadən verdiyi məlumata görə, təbrik məktubunda deyilir: "Qırğız Respublikasının Prezidenti vəzifəsinə seçkilərdə qələbəniz münasibətilə Sizi səmimi qəlbdən təbrik edirəm. Əminəm ki, Azərbaycan ilə Qırğızıstan arasındakı mövcud dostluq və əməkdaşlıq münasibətlərinin tarixi ənənələri xalqlarımızın yekdil iradəsinə uyğun olaraq bundan sonra da yaşayacaq və möhkəmlənəcək".

İlham Əliyev Almazbek Atambayevə möhkəm cansağlığı, xoşbəxtlik, dost Qırğızıstan xalqının rifahı naminə qarşıdakı fəaliyyətində uğurlar diləyib.