Fransa 1915-ci il hadisələrinə tarixi qiymət baxımından türk-erməni müzakirəsini təşkil etməyə hazırdır. Bunu Fransanın xarici işlər naziri Alen Jüpe Türkiyənin paytaxtı Ankara şəhərinə səfəri zamanı deyib. ANS PRESS-in “Anadolu” informasiya agentliyinə istinadən verdiyi məlumata görə, Alen Jüpe türkiyəli həmkarı Əhməd Davudoğlu ilə birgə təşkil etdiyi mətbuat konfransında bütün böyük dövlətlərin öz tarixlərini öyrənmək baxımından işlər apardıqlarını bildirib.

“1915-ci il hadisələri həm Türkiyə, həm də Ermənistan üçün çətin dövr olub. Bu dövrü tarixi komissiya araşdıra bilər. Mənim dövlətim iki tərəf arasında görüşü təşkil edə bilər”, - deyə Alen Jüpe bildirib.

Xatırladaq ki, Türkiyə tərəfinin 1915-ci il tarixi hadisələrini araşdırmaq üçün komissiya yaratmaq təklifini Fransa prezidenti Nikola Sarkozi dəstəkləmişdi. Bu məsələ ilə bağlı Türkiyənin baş naziri Rəcəb Tayyib Ərdoğan Ermənistan prezidenti Serj Sarkisyana məktub da ünvanlayıb.