Bu gün Bakıda “Harley Davidson” şirkətinin Azərbaycandakı yeganə distribütoru olan “Azman Co” şirkəti tərəfindən möhtəşəm motoyürüş təşkil edilib. “Azman Co” şirkətinin direktoru Rüfət Məsimovun ANS PRESS-ə verdiyi məlumata görə, bugünkü tədbirin əsas məqsədi xeyriyyəçilikdir.

“Mərdəkan qəsəbəsində yerləşən uşaq evinə köməklik məqsədilə tədbir təşkil etmişik. Bu aksiyada bütün motohəvəskarları məmuniyyətlə iştirak edirlər”, - deyə Rüfət Məsimov vurğulayıb.

Onun sözlərinə görə, bu tədbirdə eyni zamanda motosezonun bağlanması qeyd olunur.

Motoyürüş Bibiheybət prospekti, 2, Bina 7 ünvanında yerləşən “Harley-Davidson Baku” motosiklet mağazasının qarşısından başladı və paytaxt küçələrində moto həvəskarları öz bacarıqlarını nümayiş etdirdilər. Sonra tədbir Bilgəhdəki “Jumeirah Bilgah Beach Hotel”də davam edib.

Qeyd edək ki, 2013-cü ildə “Harley Davidson”un 110 illiyinə buraxılmış “Custom-1200” modelinin təqdimetmə mərasimi “Jumeirah Bilgah Beach Hotel”-də keçiriləcək.