Azərbaycan Respublikasının Misir Ərəb Respublikasındakı səfiri Şahin Abdullayev Qətərin ərəbdilli “Əlcəzirə” televiziya kanalına müsahibə verib. Səfir Ş.Abdullayev müqəddəs Ramazan bayramı münasibətilə ərəb-İslam dünyasını təbrik edərək, ən səmimi arzularını çatdırıb.

Azərbaycanın İslam sivilizasiyasının zəngin irsini və ərəb dünyası ilə tarixi əlaqələri bölüşdüyünü qeyd edən səfir Azərbaycan xalqının İslam mədəniyyəti, incəsənəti və ədəbiyyatına verdiyi töhfələrdən danışıb, Azərbaycanda Ramazan ayının və bayramının qeyd olunması ənənələri haqqında televiziya tamaşaçılarına məlumat verib.

Azərbaycanda dini vəziyyət barədə aparıcının sualını cavablandıran səfir Azərbaycanın demokratik və dünyəvi dövlət olduğunu, bütün dinlərin nümayəndələrinə öz dini ibadətlərini və adət-ənənələrini sərbəst və azad şəkildə ifadə etməyə tam şərait yaradıldığını qeyd edib.

Ərəb dünyasında baş verən hadisələrlə əlaqədar aparıcının sualını cavablandıran səfir Azərbaycanın digər dövlətlərin daxili işlərinə qarışmaq siyasətindən kənar olduğunu qeyd edərək, Azərbaycanın xalqların demokratik seçiminə hörmətlə yanaşdığını bildirib.

Azərbaycanın ərəb dünyası və Misir ilə əlaqələrindən danışan səfir Azərbaycanın müstəqilliyini bərpa etdikdən sonra ərəb-İslam dünyası ilə əlaqələrin inkişafına xüsusi əhəmiyyət verdiyini, hazırda ərəb dünyası ilə Azərbaycan arasında əlaqələrin yüksək inkişaf səviyyəsinə malik olduğunu və bu əməkdaşlığın daha da inkişafı üçün böyük potensialın olduğunu qeyd edib.

Səfir Ermənistanın Azərbaycana təcavüzü və ermənilərin Azərbaycana qarşı yürütdüyü etnik təmizləmə siyasəti barədə televiziya tamaşaçılarına ətraflı məlumat verib. ANSPRESS