APA-nın məlumatına görə, iclasda bəzi bələdiyyələrə təkrar, əlavə və yeni seçkilərin keçirilməsi məsələsinə baxılıb. İclasa sədrlik edən MSK sədri Məzahir Pənahov bildirib ki, Azərbaycanda 23 dekabr 2009-cu ildə 1718 bələdiyyə üzrə seçkilər keçirilib: “1709 bələdiyyə formalaşdırılıb. 9 bələdiyyə ilə bağlı seçkilərin nəticəsi etibarsız hesab edilib. Həmin vaxtdan indiyədək 1 bələdiyyədə üzvlərin sayı kvormdan aşağı düşüb”.

M. Pənahov bəzi bələdiyyə üzvləri yerlərinin isə 1, 2 yaxud daha çox sayda müxtəlif səbəblərdən azaldığını bildirib

Ümumilikdə 320 bələdiyyə üzrə 464 yerə bələdiyyə seçkisi keçiriləcək.

“9 bələdiyyə tam tərkibdə yenidən seçiləcək”, - deyə, M. Pənahov bildirib.

Daha sonra bələdiyyələrə təkrar, əlavə və yeni seçkilərin keçirilməsi barədə qərar qəbul olunub. Qərara əsasən, seçkilər 30 noyabr 2011-ci ildə keçiriləcək. APA