Yeni ilin ilk günündən başlayaraq Azərbaycanın şimal bölgəsində şaxtalı hava müşahidə olunur. Ötən gecə isə bölgəyə qar yağıb. Quba ərazi hidrometeorologiya idarəsinin müdiri Aliyə Ələkbərovanın ANS PRESS-in bölgə müxbirinə verdiyi məlumata görə, şaxtalı hava yanvarın 4-nə kimi davam edəcək.

Qar ən çox Quba rayonunun Xaltan kəndinə yağıb. Burada qarın hündürlüyü 12 sm, havanın hərarəti isə -6 dərəcədir. Qubanın Xınalıq kəndində isə qarın hündürlüyü 4 sm, havanın temperaturu isə -12-yə çatıb. Qubanın özündə isə vəziyyət nisbətən yaxşıdır. Burada -2 dərəcə şaxta var və şəhərdə qarın hündürlüyü 2 sm-ə çatıb.

Şaxtalı hava rayonun yollarının buz bağlamasına səbəb olub. Lakin hələlik vəziyyət o qədər də kritik həddə çatmayıb.

Qusar rayonunda da şaxtalı hava müşahidə olunur. ANS PRESS-in bölgə müxbirinin verdiyi məlumata görə, hazırda rayonda qar yağır. Qusarda havanın temperaturu -6 dərəcə, qarın hündürlüyü isə 4 sm-ə çatıb. Qusar rayonunda da yollar buz bağlayıb.