May ayının 23-dən başlayaraq Azərbaycan hərbçiləri Azərbaycan-Türkiyə ikitərəfli əməkdaşlıq planı çərçivəsində müxtəlif tədbir və kurslarda iştirak etmək üçün Türkiyəyə silsilə səfərlər edəcək. Müdafiə Nazirliyinin mətbuat xidmətindən ANS PRESS-ə verilən məlumata görə, ilk olaraq 23-30 may tarixlərində İstanbulda Türkiyə və Azərbaycanın qoşun növləri ixtisas məktəblərindən Maddi-Texniki Təminat və Taktika müəllimlərinin qarşılıqlı mübadiləsi aparılacaq.

Məlumata görə, 24-26 may tarixlərində H.Əliyev adına Azərbaycan Ali Hərbi Məktəbinin rəisi Türkiyə Respublikası Quru Qoşunları Hərbi Məktəbini (AAHM) ziyarət məqsədilə Ankaraya səfər edəcək. Eyni zamanda AAHM yüngül atletika komandasının Türkiyə Respublikası Quru Qoşunları Hərbi Məktəbində keçiriləcək idman yarışlarında iştirakı da planlaşdırılır.

İkitərəfli əməkdaşlıq planına əsasən 31.05-09.07.2010 tarixlərində Azərbaycan və Türkiyə hərbçiləri “Tank əleyhinə tağımın idarə edilməsi”, “Əzələ oynaq şişlərinin cərrahiyyəsi” və “Hərbi Sərbəst Paraşütlə tullanma” kurslarına qatılacaqlar. ANSPRESS