APA-nın «İTAR-TASS»-a istinadən verdiyi məlumata görə, Federal Təhlükəsizlik Xidmətinin İctimaiyyətlə Əlaqələr Mərkəzində bildirilib ki, gəmidə nərəkimilər növündən olan böyük partiya balıq və qara kürü olub.
Avqustun 10-da Kaspiysk şəhərinin sərhəd keşikçi gəmilərinə məxsus «Stavropol» keşikçi gəmisi Xəzərin orta hissəsində naməlum gəmi aşkarlayıb. Gəminin göyərtəsində 3 motorlu qayıq da olub. Keşikçi gəmisi yaxınlaşan zaman 2 motorlu qayıq qaçmağa cəhd göstərsə də, tezliklə saxlanılıb.
Saxlanılan «Xəzər» balıqçı gəmisinin 8 nəfərdən ibarət ekipajı Azərbaycan vətəndaşlarıdırlar. Gəmidə ümumi çəkisi 2 ton olan 80 ədəd nərə balığı və 8 kiloqram nərə balığının kürüsü aşkarlanıb.
Balıqçı gəmisi və qayıqlar araşdırma üçün Mahaçqalaya aparılıb. APA