Türkiyənin daxili işlər naziri Müəmmər Gülər​​ 2003-2012-ci illərdə 354 min 16 nəfərin Türkiyə vətəndaşlığından imtina etdiyi və ya çıxarıldığını açıqlayıb. APA-nın məlumatına görə, nazir xarici dövlətin Türkiyə maraqlarına uyğun gəlməyən xidmətində olduğu üçün 1, döyüş halındakı başqa bir dövlətin xidmətində olduğu üçün 3 nəfərin, xaricdən dönmədiyi üçün də 5 hərbi vəzifəlinin Türkiyə vətəndaşlığından çıxarıldığını deyib. O bildirib ki, 10 il ərzində 124 min 647 əcnəbiyə Türkiyə vətəndaşlığı verilib və bunlardan 15 min 588 nəfəri Azərbaycan vətəndaşıdır: “44 min 40 Bolqarıstan, 15 min 588 Azərbaycan, 7 min 518 Rusiya, 6 min 723 Quzey Kıbrıs, 6 min 335 Əfqanıstan və 3 min 700 Suriya vətəndaşı Türkiyə vətəndaşlığına keçib”.

Nazir qeyd edib ki, 10 il ərzində 354 min 16 nəfər Türkiyə vətəndaşlığından çıxıb ya da çıxarılıb: “Bu şəxslərdən 8 min 244-ü vətəndaşlıqdan çıxarıldığı halda, 327 min 946 nəfər könüllü vətəndaşlıqdan çıxıb, 17 min 826 nəfər isə vətəndaşlıq haqqını itirib. 2012-ci ildə 39 min 185 əcnəbiyə iş icazəsi, 52 min 538 əcnəbiyə isə təhsilə görə ölkədə yaşama icazəsi verilib”.