Türkiyənin Kanal D telekanalında yayımlanacaq yeni "Susuz Yaz" serialının aktyor heyəti ilk dəfə bir araya gəlib. Hürriyyətin sentyabrın 30-da verdiyi xəbərə görə, aktyorlar ilk oxu məşqində toplaşıb və məşq əyləncəli anlarla yadda qalıb.
Serial tanınmış türk yazıçısı Necati Cumalının eyniadlı əsəri əsasında ekranlaşdırılır. Layihənin rejissorları Yusuf Pirhasan və Mehmet Can Bindal, ssenari müəllifi isə Sema Ergenekondur. Hürriyyət yazır ki, kanalın yeni mövsüm üçün ən iddialı layihələrindən biri sayılan serial güclü hekayəsi və aktyor heyəti ilə diqqət çəkir.
Baş rollarda "Yalı Çapkını" serialı ilə geniş şöhrət qazanan Mert Ramazan Demir (Osman), Lizge Cömert (Bahar) və Batuhan Bozkurt Yüzügüleç (Hasan) çəkilir. Aktyor heyətində həmçinin Şebnem Bozoklu (Döne), İrem Sak (Yeter), Serpil Gül (Beyaz), Deniz Celiloğlu (Resul), Umut Kurt (Ramo), Şirin Sultan Şaldamlı (Fatma), Güneş Sayın (Hatice), Begüm Akkaya (Dilan), Ilgım İpekçi (Elvan), Meriç Rakalar (Müslüm), Özgür Daniel Foster (Murtaza), Kayra Zapçı (Gülşen), Esra Ünnü (Filiz) və Kemal Burak Alper (Cevri) kimi adlar yer alır.
Hürriyyətin məlumatına görə, serialın çəkilişləri yaxın günlərdə Adanada başlayacaq. Oxu məşqindən sonra komanda çəkiliş meydançasında işə başlamaq üçün gün sayır. Ay Yapım şirkətinin istehsalı olan "Susuz Yaz" tezliklə Kanal D-də tamaşaçılarla görüşəcək, dəqiq yayım tarixi isə hələlik açıqlanmayıb.
Xatırladaq ki, Necati Cumalının "Susuz Yaz" əsəri Türkiyə kinosunun klassiklərindəndir: 1963-cü ildə Metin Erksanın çəkdiyi eyniadlı film 1964-cü ildə Berlin Beynəlxalq Film Festivalında "Qızıl Ayı" mükafatına layiq görülmüşdü. Əsər Egey bölgəsində su uğrunda gedən mübarizə fonunda iki qardaşın və bir gənc qadının taleyindən bəhs edir. İndi isə əsər serial formatında yenidən ekranlaşdırılır.
Türk serialları Azərbaycanda da geniş tamaşaçı auditoriyasına malikdir, ona görə də "Susuz Yaz"ın yayım tarixi yerli izləyicilər üçün də maraq doğurur.
Mənbə: Hürriyet
Şərhlər