“Unibank” müştərilərə kredit xidmətlərinin məsafədən göstərilməsi üzrə yeni layihəyə start verib. Bankın mətbuat xidmətindən ANS PRESS-ə verilən məlumata görə, “Unidirect” xidməti çərçivəsində bank kredit sifarişlərinin qəbulunu elektron poçt vasitəsi ilə aparır və kreditlərin alınmasını müştərilərin iş yerlərini tərk etmədən təmin edir. Bunun üçün artıq [email protected] ünvanına elektron məktub yollamaq belə kifayətdir.

Bankın mütəxəssisləri kredit siafarişləri müştərilərin məhz xidməti və korporativ elektron ünvanlarından on-layn rejimində qəbul edirlər. Bundan sonra hər bir müştəri ilə əlaqə saxlanılır, kredit sifarişi üzrə məsləhərlər verilir və şəxsiyyət vəsiqəsinin nüsxəsi alınır. Bu zaman digər sənədlərin təqdim edilməsinə ehtiyac olmur. Sifariş üzrə müsbət qərar çıxarılan kimi bank mütəxəssiləri kreditin rəsmiləşdirilməsini müştərinin iş yerində aparırlar. Nəticədə ən qısa bir zamanda bankın kassalarına müraciət etmək zərurəti olmadan borcalana kredit kartı verilir.

“İş yerinə çatdırılan kreditlər heç şübhəsiz ki, müştərilərə maksimal rahatlıq verir”, - deyə “Unibank” ASC-nin Riteyl-məhsulların inkişafı üzrə Baş meneceri Taleh Tahirli vurğulayır. Onun sözlərinə görə, bu növ fərdi kreditlər üzrə müştərilərdə əlavə xərclərə ehtiyac olmur. “Biz filiallarımıza müraciət etmək üçün vaxt tapa bilməyənləri yaxşı anlayırıq, bu səbəbdən də Azərbaycanda ilk dəfə əhaliyə məsafədən xidmətlər göstərən lider bank olmaq istəyirik”, - o qeyd edib.

Qeyd edək ki, bankın yeni “Unidirect” xidməti hələlik ancaq Bakıda fəaliyyət göstərir, amma yaxın bir zamanda ölkənin digər bölgələrinə də şamil olunacaq.

Xatırladaq ki, iyulun 24-də “Unibank” “Kreditlər qapınıza gəlir” kredit yarmarkaların keçirilməsinə başlayıb. Bu zaman müştərilərə daha rahat tərzdə xidmət göstərmək üçün bank xüsusi yaratdlğl mobil ofisi vasitəsi ilə onların yaşayış yerlərində kredit sifarişlərinin qəbulunu təmin edir.