Mbask sığorta şirkəti adını "AXA Mbask" ilə əvəz edib. Bu barədə Maliyyə Nazirliyi yanında Dövlət Sığorta Nəzarəti Xidmətinin saytında yerləşdirilmiş məlumatda bildirilib.

“2010-cu ilin 7 dekabrında Mbask-ın lisenziyası şirkətin adının dəyişdirilməsi ilə əlaqədar olaraq yenilənib”,- deyə məlumatda deyilib.

Xəbər verildiyi kimi, Fransanın AXA şirkəti 2010-cu ilin 14 oktyabrında İspaniyanın AXA Seguros Generales, S.A., De Seguros Y Reaseguros törəmə şirkəti vasitəsilə Azərbaycanın "MBASK" Sığorta Şirkətinin səhmlərinin 51%-nin əldə edilməsi prosesini yekunlaşdırıb. Şirkətin səhmlərinin 49 faizi Azərbaycan vətəndaşı Eldar Qəribova məxsusdur.

Mbask 1992-ci ildə yaradılıb və tədiyə yığımının həcminə görə ölkənin aparıcı sığorta şirkətlərinin onluğuna daxildir. Hazırda şirkətin nizamnamə kapitalı 5,73 mln. manata bərabərdir. Yanvar-oktyabr ayları ərzində şirkətin tədiyə yığımı 6,68 mln. manat, ödənişləri 3 mln. manat məbləğində olub.