Azərbaycanın tanınmış sənət adamları ümumtəhsil məktəblərində vahid məktəbli forması ətrafında gedən müzakirələrə qoşulub. Oktyabrın 11-də Redaktor.az-a açıqlama verən Xalq artistləri Qurban İsmayılov, Firəngiz Mütəllimova, Rafiq Əzimov, Nəzakət Teymurova, Gülyanaq Məmmədova və Sərdar Fərəcov Nazirlər Kabinetinin müvafiq qərarını dəstəklədiklərini bildiriblər.
Məktəblərdə vahid geyim tərzi və hicab mövzusu son günlər sosial şəbəkələrdə kəskin fikir ayrılıqlarına, bəzən isə qarşılıqlı təhqirlərə səbəb olub. Sənətçilərin açıqlamaları oktyabrın 12-də digər saytlarda da yayılıb və geniş müzakirə olunub.
Qurban İsmayılov: "Biz bir-birimizə qarşı niyə düşmən olmalıyıq?"
Xalq artisti, aktyor Qurban İsmayılov ilk növbədə sosial şəbəkələrdəki gərginliyə münasibət bildirib: "Ölkədə bu barədə çox söhbət gedir, sosial şəbəkələrdə insanların bir-birinə düşməncəsinə həqarət etməsini, söyməsini görürük. Bu, heç də yaxşı hal deyil".
Aktyor məsələni məscid qaydaları ilə müqayisə edib: "Məscid üçün dinin qəbul olunmuş qaydaları var, ora şortiklə girmək olmaz. Eyni ilə, dövlət də öz məktəbi üçün qanun və qərar verib ki, hicabla olmaq olmaz". Onun fikrincə, problem sadə yolla həll oluna bilər: "Uşaq məktəbin qapısına qədər hicabla gələ bilər, daxil olarkən hicabını çıxarıb çantasına qoyar, dərsinə girər. Çıxanda isə təzədən hicabını bağlayıb gedər".
Firəngiz Mütəllimova: "Məktəbdə uşaqlar eyni olmalıdır"
Xalq artisti Firəngiz Mütəllimova öz məktəb illərini xatırladıb: "O vaxt biz də oxuyanda hamı məktəbli formasında geyinirdi. Fartuq taxırdıq, hamı eyni olurdu". Aktrisa dinə hörmətin həmişə olduğunu vurğulayıb, lakin məktəb mühitində bərabərliyin qorunmasını vacib sayıb: "Məktəb qurtarsın, məktəbdən sonra kim nə istəyir eləsin. Məktəbdə isə uşaqlar eyni olmalıdır".
Rafiq Əzimov və Nəzakət Teymurova da qərarı dəstəkləyib
Xalq artisti Rafiq Əzimov məktəblilərin vahid formada dərsə gəlməsini "çox vacib məsələlərdən biri" adlandırıb və keçmiş dövrü xatırladıb: "Qızların da elə gözəl formaları vardı ki, küçədə onları görəndə bilirdik ki, bunlar məktəblidir. Amma indi hamısı qarışıb bir-birinə". Aktyor Nazirlər Kabinetinin qərarını tam dəstəklədiyini bildirib.
Xalq artisti, xanəndə Nəzakət Teymurova isə vahid formanın şagirdlər arasında fərqləri aradan qaldırdığını deyib: "Məktəblərdə eyni formanın olması yaxşıdır ki, heç kim bir-birindən seçilmir". Xanəndə məktəbli qızların makiyaj etməsini və uzun dırnaq qoymasını "şagirdə xas olmayan" hallar kimi qiymətləndirib.
Musiqiçilərin mövqeyi
Rəşid Behbudov adına Dövlət Mahnı Teatrının solisti, Xalq artisti Gülyanaq Məmmədova səhnə ilə məktəb arasında paralel aparıb: "Mən səhnədə geyim mədəniyyətini necə qoruyuramsa, məktəbdə də geyim mədəniyyəti qorunmalıdır". Onun sözlərinə görə, vahid forma şagirdlər arasında "bu ucuzdur, bu bahalıdır" söhbətlərinin qarşısını alır.
Üzeyir Hacıbəylinin Ev Muzeyinin direktoru, Xalq artisti, bəstəkar Sərdar Fərəcov "Qarışıq geyimlər istər-istəməz qarışıq fikirlər yaradır" deyərək vahid formanın tərəfdarı olduğunu bildirib. Əməkdar mədəniyyət işçisi Aşıq Samirə Əliyeva isə hətta müəllimlər üçün də xüsusi geyim tətbiq olunmasını istədiyini söyləyib.
Müzakirənin arxa planı
Bakı Şəhəri üzrə Təhsil İdarəsi oktyabrın 9-da ümumi təhsil müəssisələrində Nazirlər Kabinetinin qərarı ilə müəyyən edilmiş vahid məktəbli forması tələblərinin icrasına dair monitorinqlərə başlanıldığını açıqlamışdı. İdarə bildirmişdi ki, şagirdlərin müəyyən olunmuş formada dərsə davamiyyətini təmin etmək valideynlərin birbaşa məsuliyyətidir.
Ondan bir gün sonra Xalq şairi Sabir Rüstəmxanlı da mövzuya münasibət bildirərək vahid məktəbli formasının tətbiqinin hicaba və ya baş örtüyünə qarşı yönəlmədiyini, məqsədin uşaqların ayrı-seçkiliyə məruz qalmadan böyüməsi olduğunu demişdi. Mövzu ilə bağlı ictimai müzakirələr davam edir.
Mənbə: Redaktor.az
Şərhlər