Xalq artisti Röya Ayxan və müğənni Nazilə Səfərli dövlət məktəblərində vahid məktəbli formasının tətbiqi ilə bağlı son günlər qızışan müzakirələrə münasibət bildirərək sənət yoldaşlarını susmamağa və birliyə çağırıblar. Röya Ayxan fikirlərini oktyabrın 13-də instaqram hesabında paylaşıb, Nazilə Səfərlinin açıqlaması isə oktyabrın 14-də səhər saatlarında yayılıb. Ötən gün Xalq artisti Gülyanaq Məmmədova, Əməkdar artistlər Lalə Məmmədova və Elza Seyidcahan da mövzu ilə bağlı mövqelərini açıqlayıblar.
Röya Ayxan: “Qoy övladlarımız rahat böyüsün”
Publika.az-ın yaydığı paylaşımda Röya Ayxan cəmiyyətdəki mübahisələrin onu həm vətəndaş, həm də ana kimi narahat etdiyini yazıb: “Son günlər ölkəmizin, insanların birliyi ətrafında yaranan müzakirələr və mübahisələr bu dövlətin vətəndaşı kimi məni də narahat edir. Hər şeydən öncə mən bir anayam, övladımın məktəbdəki nizam-intizamına, geyiminə hər zaman diqqət etməyə çalışmışam”.
Müğənninin fikrincə, vahid geyim qaydalarının şagirdlərə izah edilməsi və maarifləndirmə işi təhsil prosesinin tərkib hissəsidir. O, valideynləri uşaqları təhsilə, elmə və biliyə yönəltməyə çağırıb: “Qoy övladlarımız rahat böyüsün, gələcəyini seçmə şansı olsun. Bundan gözəl nə var?” Röya Ayxan bu gün verilən qərarlara görə bir neçə il sonra təşəkkür ediləcəyini deyib və misal olaraq sərhədlərin bağlı qalmasına vaxtilə edilən etirazları xatırladıb.
Xalq artisti paylaşımını həmkarlarına müraciətlə bitirib: “Əziz həmkarlarım, bu məsələdə heç birimiz susmamalı, azərbaycanlı mövqeyimizi ortaya qoymalıyıq. Hamımız bu Vətənin övladlarıyıq, ona sahib çıxaq, təxribatlara uymayaq, əzizlərim!”
Nazilə Səfərli: “Bütün sənət yoldaşlarımı birliyə çağırıram”
Musavat.com-a danışan Nazilə Səfərli qaydalara əməl olunmasının vacib olduğunu vurğulayıb: “Bir qayda varsa, ona əməl edilməlidir. Qanunlar sadəcə məcəllədə yer alsın deyə yazılmır. Bu gün məktəblilər üçün vahid forma müəyyən edilibsə, hamı ona əməl etməlidir”. Sənətçi qərarı “gecikmiş addım” adlandırıb və özəl, yaxud dövlət məktəbi fərqi olmadan bütün şagirdlərin eyni cür geyinməsini arzuladığını deyib.
Müğənni hicabla bağlı suallara isə cavab verməyəcəyini bildirib: “Mən nə siyasət bilirəm, nə də din. Hicabla bağlı mənə suallar verməyin”. Nazilə Səfərli sözlərini birlik çağırışı ilə yekunlaşdırıb: “Niyyəti xoş olmayanların insanları bir-birindən ayırmasına, pərən-pərən salmasına imkan verməyək! Bütün sənət yoldaşlarımı birliyə çağırıram!”
Gülyanaq Məmmədova, Lalə Məmmədova və Elza Seyidcahan
Xalq artisti Gülyanaq Məmmədova “Yeni Sabah”a açıqlamasında orta məktəbdə oxuduğu 11 il ərzində bir gün belə sərbəst geyimdə dərsə getmədiyini xatırladıb. Onun sözlərinə görə, vahid forma ailələrin maddi imkanlarındakı fərqin sinif otağında qabarmasının qarşısını alır. Sənətçi fərqli düşünənlərə də hörmət çağırışı edib: “Bu məsələdə fərqli düşünən, hicablı olan insanlar da bizim əzizlərimiz, doğmalarımız, qohumlarımız, övladlarımızdır... Bu cür qarşıdurmalar Azərbaycana lazım deyil”.
Əməkdar artist Lalə Məmmədova sosial şəbəkə paylaşımında hər kəsin dini seçimində azad olduğunu, lakin baş örtmə qərarının uşaq yaşında deyil, yetkin yaşda verilməli olduğunu yazıb. O, “dövlət məktəblərində qanuna tabe olmaq bizim borcumuzdur” fikrini vurğulayıb. Əməkdar artist Elza Seyidcahan isə azxeber.com-a deyib ki, şagirdlərin hətta məktəb çantaları və ayaqqabıları da eyni olsa yaxşı olardı; onun əsas arzusu hər məktəblinin heç olmasa bir musiqi alətində çalmağı bacarmasıdır. Xalq artisti Əli Nur da Oxu.Az-a açıqlamasında məktəblərdə təxribata cəhd edənlərin ciddi cəzalandırılmasını istəyib.
Müzakirələrin arxa planı
Mübahisələr Nazirlər Kabinetinin qərarı ilə dövlət ümumi təhsil müəssisələrində vahid geyim formasının tətbiqindən sonra başlayıb. Daxili İşlər Nazirliyi oktyabrın 12-də bildirib ki, Bakıda bir qrup şəxs məktəblərdə təhsil işçiləri ilə münaqişəli vəziyyət yaradıb və ictimai qaydanı pozub; Cinayət Məcəlləsinin 233-cü maddəsi ilə cinayət işi başlanılıb, 37 nəfər həbs edilib. Qafqaz Müsəlmanları İdarəsinin sədri Şeyxülislam Allahşükür Paşazadə oktyabrın 13-də “Real TV”yə müsahibəsində qəbul olunan qərarda “hicab” sözünün olmadığını, söhbətin vahid məktəbli geyimindən getdiyini deyib və məsələnin Təhsil Nazirliyi vasitəsilə həll olunacağına inandığını bildirib.
Ötən günlərdə Qurban İsmayılov, Firəngiz Mütəllimova və Rafiq Əzimov da mövzuya münasibət bildirmişdilər. Röya Ayxan və Nazilə Səfərlinin açıq çağırışından sonra şou-biznesdən yeni açıqlamaların gəlməsi gözlənilir.
Mənbə: Publika.az, Musavat.com, Sfera.az, Qafqazinfo
Şərhlər