Türkiyənin “Show TV” kanalında yayımlanan və Azərbaycanda da geniş auditoriyası olan “Qızılcıq şərbəti” (“Kızılcık Şerbeti”) serialında ssenari komandası dəyişir. Türkiyə mətbuatının oktyabrın 11-də yaydığı məlumata görə, layihəni ilk seriyadan yazan Melis Civelek və Zeynep Gürün yerinə dörd nəfərlik yeni müəlliflər qrupu gəlir. Eyni gün serialdan ötən mövsüm ayrılan aktrisa Ceren Karakoç da layihədən necə uzaqlaşdırıldığını ilk dəfə açıq danışıb.
Yeni müəlliflər kimlərdir?
“Gold Film” şirkətinin istehsalı olan, prodüseri Faruk Turqut, rejissoru Özgür Sevimli olan serial hazırda beşinci mövsümünü yayımlayır. “Sözcü” qəzetinin yazdığına görə, dəyişiklik 143-cü seriya mərhələsində qüvvəyə minir. Bundan sonra hekayəni Ozan Yurdakul, Meryem Gür, Burcu Över və Caner Güler yazacaq.
Diqqətçəkən məqam ondan ibarətdir ki, Ozan Yurdakul uzun illər cümə günü axşamların ən çox izlənən layihələrindən biri olan “Arxa küçələr” (“Arka Sokaklar”) serialının ssenaristi olub. Həmin serial da cümə günləri “Qızılcıq şərbəti” ilə eyni vaxtda efirə çıxır. Beləliklə, rəqib layihənin müəllifi indi onun əsas rəqibinin hekayəsini yazacaq.
Melis Civelek və Zeynep Gür isə yeni layihələri – “Anne Yarısı” və “Mavi Orkide” serialları üzərində cəmləşəcəklər. Jurnalist Birsen Altuntaşın məlumatına görə, ayrılığın səbəbi ssenarinin istiqaməti, personajların taleyi və iş prosesi ilə bağlı yaradıcı fikir ayrılıqlarıdır. Lakin nə prodüser şirkəti, nə də ssenaristlər bu barədə rəsmi açıqlama veriblər.
Serial bitirmi?
Dəyişiklik xəbəri yayıldıqdan sonra sosial şəbəkələrdə serialın 143-cü seriya ilə final edəcəyi barədə iddialar yayılmışdı. Türkiyə mətbuatı isə final barədə heç bir qərarın olmadığını, söhbətin yalnız müəllif heyətinin dəyişməsindən getdiyini vurğulayır. Serial cümə günləri saat 20:00-da “Show TV”də yayımlanmağa davam edir.
Reytinqlər də layihənin hələ də güclü mövqedə olduğunu göstərir. Oktyabrın 9-da yayımlanan 142-ci seriya “Total” kateqoriyasında 4,73 reytinqlə gecənin üçüncü, AB qrupunda 5,26, ABC1 qrupunda isə 5,55 reytinqlə ikinci ən çox izlənən layihəsi olub. Seriyanın finalında Abdullah Ünalın borclar səbəbindən satışa çıxarılan malikanəsini Asude və Asilin satın alması tamaşaçılar arasında geniş müzakirəyə səbəb olub.
Ceren Karakoç: “Mənim işimə son qoyuldu”
Dörd mövsüm boyunca Nursema obrazını canlandıran Ceren Karakoç jurnalist Ayşe Armanın qonağı olduğu müsahibədə serialdan ayrılma prosesini danışıb. Aktrisanın sözlərinə görə, yeni mövsüm üçün prodüserlə görüşüb davam etmək barədə razılığa gəlsə də, tətildə olarkən prodüser şirkətindən təcili çağırılıb.
Karakoç personajının qəzada öləcəyindən əvvəlcədən xəbərsiz olduğunu, ayrılığın onun istəyi ilə baş vermədiyini bildirib. O, yaşadıqlarını “Mənim işimə son qoyuldu” sözləri ilə ifadə edib. Aktrisa qərarın ona gec bildirildiyi üçün başqa layihə ilə müqavilə bağlamaq imkanını da itirdiyini deyib.
Karakoç serialda Pembe obrazını oynamış Sibel Taşçıoğlunun ayrılığına da toxunub: “Sibel Taşçıoğlu da biz setdə idik və bir seriya sonra personajının öləcəyini həmin gün setdə, çəkiliş zamanı öyrəndi”. Onun sözlərinə görə, bu cür hallar sektorda başqa aktyorların da başına gəlir. Aktrisa serialdan ayrıldıqdan sonra yeni mövsümü izləmədiyini də etiraf edib.
Arxa plan
2022-ci ildə efirə başlayan “Qızılcıq şərbəti” fərqli həyat tərzinə malik iki ailənin evlilik vasitəsilə qohumlaşmasından bəhs edir və ilk mövsümlərindən Türkiyədə reytinq liderləri sırasındadır. Serial Azərbaycanda da ən çox izlənən türk layihələrindən biridir. Pembe obrazının ölümü layihənin ən çox müzakirə olunan ayrılıqlarından biri olmuşdu. Karakoçun yeni mövsüm öncəsi heyətdən çıxması isə bu mövzunu yenidən gündəmə gətirib. Yeni müəlliflər komandasının hekayəyə hansı istiqaməti verəcəyi növbəti seriyalarda bəlli olacaq.
Şərhlər