Müğənni Günel Zeynalova türkiyəli müğənni və televiziya aparıcısı Seda Sayanla illərdir davam edən incikliyinin səbəbini açıqlayıb. Sənətçinin İsa Şükürovun aparıcılıq etdiyi “Sevilən səhər” proqramında səsləndirdiyi fikirlər oktyabrın 14-də yerli mediada geniş yayılıb. Günelin sözlərinə görə, münasibətləri təxminən 16 il əvvəl Seda Sayanın verilişində “Sarı gəlin” mahnısı ilə bağlı yaşanan hadisədən sonra pozulub.
“Bunu heç kim bilmir”
Müğənni efirdə həmin günü belə xatırlayıb: “Bunu heç kim bilmir. O vaxtdan bəri heç vaxt onun verilişinə çıxmamışam. Kinli deyiləm. Azərbaycan mahnısını, “Sarı gəlin”i ifa etmək istədim. Bu zaman dilim sürüşdü, Azərbaycan və Türkiyə türkcəsinin sözlərini qarışdırdım. Orada mənə bir kəlmə dedi. Mən isə mahnı getdiyi halda Seda Sayana tərəf dönüb dedim ki, “sən biabır olacaqsan, Azərbaycan səni qəbul etməyəcək””.
Mətbuatın xatırlatdığına görə, Seda Sayan həmin vaxt Günelə “korlanmış türkcənlə danışma” deyib. Müğənni bildirib ki, o hadisədən sonra Seda Sayanın verilişinə bir daha qatılmayıb. Lakin ikisi illər sonra bir məclisdə üz-üzə gəlib: “Onu təqdim etməyimi istədilər, mən də “hər kəsin sevimlisi Seda Sayan” deyə təqdim etdim”, – deyə Günel əlavə edib.
2010-cu ilin “Sarı gəlin” qalmaqalı
Söhbət 2010-cu ilin may ayında Azərbaycan mətbuatında geniş müzakirə olunan hadisədən gedir. O vaxt Türkiyədə yaşayan və “Azəri qızı Günel” kimi tanınan müğənni Seda Sayanın aparıcılıq etdiyi “Sabahın sədası” proqramına qonaq olmuşdu. Milli.Az-ın həmin dövrdəki xəbərlərinə görə, verilişdə Azərbaycan xalq mahnısı “Sarı gəlin” erməni mahnısı kimi təqdim olunub, Günel isə buna etiraz etmək istəsə də, fikrini sona qədər çatdıra bilməyib. Özünü qarabağlı, ağdamlı kimi təqdim edən müğənni o zaman həmin kanalın efirinə bir daha çıxmayacağını açıqlamışdı. Milli.Az həmin vaxt bunun Seda Sayanın verilişində azərbaycanlılar üçün xoşagəlməz məqamın ikinci dəfə yaşandığını da yazmışdı.
Hadisə Türkiyədəki azərbaycanlı diaspor təşkilatlarının da reaksiyasına səbəb olmuşdu. İstanbuldakı İlhamə Quliyeva adına Mədəniyyət Mərkəzinin rəhbəri Sərxan Kərəmoğlu o zaman bildirmişdi ki, Seda Sayan telefon danışığında mahnının ermənilərə məxsus olduğunu iddia etmədiyini deyib və canlı efirdə məsələyə aydınlıq gətirəcəyinə söz verib. Kərəmoğlu aydınlıq gətirilməyəcəyi təqdirdə etirazlarını davam etdirəcəklərini də vurğulamışdı. Qeyd edək ki, “Sarı gəlin”in mənşəyi ətrafında mübahisələr uzun illərdir davam edir, Azərbaycanda isə mahnı xalq mahnısı kimi qəbul olunur.
Diqqətçəkən məqam odur ki, Günel indiki açıqlamasında əsas vurğunu dil məsələsinə edib, 2010-cu ildəki xəbərlərdə isə mübahisənin mərkəzində mahnının mənşəyi dayanırdı.
Seda Sayanla bağlı ilk narazılıq deyil
Seda Sayan Türkiyədə uzun illərdir həm müğənni, həm də aparıcı kimi fəaliyyət göstərir. Azərbaycan mətbuatında onun verilişinə qatılan digər azərbaycanlı ifaçıların da narazılığı yer alıb. Məsələn, müğənni İradə İbrahimova 2003-cü ildə Seda Sayanın verilişində qonaq olarkən hörmətsizliklə üzləşdiyini, bundan sonra Türkiyə şou-biznesindən uzaq durduğunu demişdi. Sonrakı illərdə Seda Sayanın “Sabahın sultanı” proqramına qonaq olan Şəbnəm Tovuzlu da aparıcının onu Sibel Cana bənzətməsinə efirdə “Ola bilsin bəzi üz cizgilərimiz oxşasın, amma mən Şəbnəm Tovuzluyam” deyə cavab vermişdi.
Qeyd edək ki, Günel Zeynalova həmin proqramda türkiyəli müğənni Ebru Gündeşlə illərlə davam edən küskünlüyündən də danışmış, onu bağışladığını demişdi.
Mənbə: Qafqazinfo
Şərhlər