13 mindən çox idmançının qatıldığı 27-ci Yay Universiadasına start verilib. Rusiyanın Kazan şəhərində keçirilən bu yarışlarda həm də rekord sayda ağır atlet də iştirak edir. ANS PRESS Azərbaycan Ağır Atletika Federasiyasına istinadən xəbər verir ki, 50 ölkədən 253 atletin yarışdığı ağır atletika yarışlarında Azərbaycan milli komandasının üzvləri də vardır.

Bu gün yığmamızın üzvlərindən ilk olaraq Yuliya Derkaç mübarizəyə qoşulub. O, qadınlar arasında 53 kq çəki dərəcəsində yarışıb. Yuliya birdən qaldırma hərəkətinə nisbətən uğursuz başlasa da, sonda liderliyi əldə edib. Derkaç ilk sifariş verdiyi 82 kq çəkini yalnız ikinci yanaşmada ram edib.

Üçüncü yanaşmada 86 kq-ı uğurla başı üzərinə qaldıran idmançımız, birdən qaldırma hərəkətində bütün rəqiblərini üstələyib. Təəssüf ki, təkanla qaldırma hərəkəti atletimiz üçün uğursuz alınıb. Birinci yanaşmasında 101 kq-ı ram edən Yuliya, sonrakı iki cəhddə 105 kq-ın öhdəsindən gələ bilməyib.

Nəticədə Derkaç bu hərəkətdə 5-ci olub. Beləliklə, toplamda 187 kq (86 kq + 101 kq) nəticə göstərən Yuliya, ümumi sıralamada da 5-ci yeri tutub.

İdmançımızı medaldan cəmi 2 kq ayırıb.